- 340 -

1388. Feb. 27. Lüben.

Herzog Heinrich, Herr zu Brieg und Lüben, verkauft 24 Mark jährl. Zinsen, von etlichen Dörfern im Lübenschen zu erheben, für 240 Mark an einige liegnitzer Bürger.

Wir Heinrich von gots gnaden herczog in Slesie herre czum Brige vnd zu Lobin, bekennen vffinlichin mit vnserm briffe allen, die een sehen adir horen lessen, das wir mit rate vnser getrawen mannen habin vorkauft vnd vff gelossen rechte vnd redlichin fier vnd czwenczik marg czinses vnd jerger gulde vmb czwehundirt marg vnd vmb firczik marg Prager grosschen vnd Polonisschir czal dem erbern manne Nicze Vngeraten, burger zu Legnicz sinen elichin erbin vnd nochkumlingen vnd czu getrawer hand maister Hammen sinem vetter, Hannus vnd Petir Vngeraten sinen brudern auch burgern zu Legnicz, czu habin vnd czu hebin alle jar vff sante Walpurgen vnd sante Michils tage, no vff sante Walpurgis tag nehste anczuhebin, an gelde, czinsse vnd an getreide czinsse vnd geschosse vff den dorfern her noch gescrebin vnd vff den gebawern vnd czinsseluten derselbin dorfere, vff deme dorfe Barschav vff sante Walpurgis tag eyne halbe marg, dornoch vf sante Michils tag do selbistin eyn halp schok grosschen vom geschosse, von deme schaulteiss do selbisten sechess grosschen, seches scheffil kornes, seches scheffil gersten vnd seches scheffil habern. Item vff Talberdorf vff sante Walpurgis tage eyne halbe marg, vff sante Michils tage dornoch eyn halp schok grosschen geschosses, vff dem schulteissen seches grosschen, vff dryen molen doselbesten drye firdunge, fir scheffil kornis, fier scheffil gersten vnd fier scheffil habirn. Item vff Czobegerdorf vff sante Walpurgis tage eyne marg grosschen, vff sante Michils tag eyne marg grosschen, munczegeldis eyn firdung grosschen, vff dem schaultessen eyn firdung, fier scheffel kornes, fier scheffel habern vnd fier scheffil gersten. Item vff Claptov eyne marg vff sante Walpurgis tag, vff sante Michils tag eyne marg grosschen, munczgeldis eyn firdung, fier scheffil kornes, fier scheffil habern vnd fier scheffil gersten. Item vff Knegnicz czwe schok vff sante Michils tag vff den fryen gebawern. Item vff Gernschindorf achczen grosschen vff sante Michils tag. Item czur Golav vff sante Michils tag seches grosschen geschosses, eyn halb marg vff czehen molen vnd eyn malder gerste. Item vffe dem Obir drye firdunge vff dryen molen vff sante Michils tage. Item vffem Keczerfelde vff Walpurgis eyn firdung grosschen, vff Michils eyn firdung grosschen, munczgeldis seches grosschen, czwene scheffil kornes, czwene scheffil habern vnd czwene scheffil gersten. Item vff Reynhardisdorf vff Walpurgis eyne marg, vff Michaelis eyne marg, monczgeldis seches grosschen, vff czwehen molen do selbsten eyne halbe marg. Item vff er Swarczav vff czwehin molen do selbsten eyne marg. Item vff Koselicz eyne halbe marg vff Walpurgis, monczegeldis seches grosschen, der schulteis seches grosschen, vff Michaelis eyne halbe marg vnd drye scheffil kornes, drye scheffil haber vnd drye scheffil gersten. Item Javschicz funftehalben firdung grosschen vff Walpurgis vnd eyn malder getreide, vff Michaelis fir scheffil kornes, fier habern vnd fier scheffil gersten. Und habin des dy czinslute vnd gebawer vnd er nochkomlyngin besiczer der guter der dorfer aller, gelegen in vnserin Lobinsschin wigbilde vorwiset vnd ledeg gelossen vnd gewiset an den egenanten Nicze Vngeraten vnd an syne erbin vnd rechten nochkumlinge, vnd an dy, den der czinss czu getrawer hand vorscrebin ist, alle jar sulchin czinns, geschoss an gelde vnd an getreyde beczalin, richten vnd dorumme antworten sullen vff alle sante Walpurgis vnd vff sante Michils tage vnd ab Niczen vnd den sinen erbin vnd den sinen der czinss vff solche czinstage gancz adir eyns teiles nicht gerichtet vnd beczalit wurde von den gebawern vnd czinsluten der obengenanten dorfer, so gebite wir vnserm hofferichter zu Lobin, der iczund ist, adir hernochmolz seyn wurde, das her dem egenanten Niczen, sinen erben, adir den der czinss vorscrebin ist, sal lan pfandis helfin vmb den vnuorgulden czinss vff den gebawern der dorfer vnd guter vorbenant; adir verlihen demselbin Niczen vnd den sinen follemacht, das her mit sinen dinern selber pfenden mag eyn hofferichter vm besucht vnd vmbesprachin vff den gutern vnd in den dorffirn vorgescrebin vnd dy pfand vorseczczin vnder cristen adir juden adir vorkaufen mogen, wy en das beste vnd nuczte geseyn mag, an allis rechtisufbitunge vnd ab alle recht dormete begangin weren, vngehindirt vnd vnvorsperret von vnser vnd vnser anewalden wegin vnd mit namen vnsir nochkumlingen wegen, dy das land zu Lobin als eyn erbherre wurden inne habin vnd vngehindirt vor idem manne geistlich adir werblichen. Des haben wir den egenanten czinss an geschosse, an gelde vnd an getreide vorkauft frey, ledeg vnd loss an alle beswerunge, dinste, bethe, stewre, ab wir dy tuen wurden adir vnser nochkumlinge keyn hindernisse tuen wellen noch wellen tun lan, dem egenanten Nicze Vngeraten, sinen erben, nochkomlingen vnd den der czinss czu getruwer hand vorscrebin ist, das em an syme czinsse schedlich geseyn mochte, sundir wir seczczin sy in dy guter vnd der guter rechte vnd redliche besiczczer. Auch ab Nicze Vngeraten vnd den sinen an dem czinsse vff den dorfern vnd gebawern derselbin vorgenanten ichtis czu kurcz geschee also, das em sin czinss nicht gar gevolgin mochte sundir gebreche, so gelobe wir yor vns vnd vor vnsern nochkumlingen, herren zu Lobin, das wir em den gebrechin an dem czinsse vff andern gutern zu Lobim im land dirfollen sullen än arg. Auch ab Nicze vnd dy seynen egenanten den czinss wedirvorkaufen, vorwechseln, vorgebin adir bescheiden welde, wy en das noczce mochte geseyn, so gelobin wir en zu vorscriben mit vnsern briffen vnd bestetegin eyner iczlichin personen geistlichir adir werltlichir, in allir masse, als wir Niczen vnd den seynen vormacht, vorscrebin vnd vfgelossen haben. Auch sul em vnser landfoit, der eczund ist, adir seyn wirt, den czinss in allirmasse inmanen, als her vns getan hat vnd vorbunden ist. Auch sulle wir vnd vnsir erbin vnd nochkumlinge fursten vnd herren zu Lobin vollemacht haben den czinss firundczwengik marg abczulossen vmb czwehundirt marg vnd vmb firczig marg. Mit vrkunde des briffes, der gegebin ist zu Lobin am dunrstage vor Oculi noch gotes geburt driczenhundirt jar vnd im acht vnd achtczegistin jare, in kegenwortekit vnsir getrawen Hannus von Bolczkes, Heynrichs von Rechinberg, Wolframs von Falkinhain, Petir Disslavs, Nicolaus Rechinberg, Hensil Febers, Jacobs vnsers scribers, dem der priff beuolin wart.

O. d. St. L. No. 170. An Pergamentstreifen das Siegel von rothem Wachs: ein schwebender Vogel auf dem Hehn mit darunter befindlichem Wappenschilde. Die Umschrift ist unkenntlich.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866